Martxoko lehendabiziko astean, martxoaren 4an, ostirala, eskolako ihauteriak ospatu genituen.
Eskolako ikas-talde bakoitza lantzen ari ginen proiektuko gaiaren mozorroa prestatu genuen. Horrela, gu, Haur Hezkuntzakoak, erlez joan ginen eta Lehen Hezkuntzako taldeak honako mozorroak zituzten:
- 1go eta 2. mailakoak, ugalketarekin erlazionaturiko jantziak (espermatozoide, obulu, emakume haurdunak, ekografia...).
- 3. eta 4. mailakoak, gorputzeko hezur eta giharrekin erlazionaturiko mozorroak (eri edo gaixoak, mediku, radiografia...).
- 5. eta 6. mailakoak, sorginez, trogloditaz... mozorrotu ziren.
Egun horretan, goizean goiz, ikasle nahiz irakasle guztiak eskolan bildu ondoren, mozorrotu ginen.
Geroago, autobusa hartu eta Itsasora, bailarako herri batera, abiatu ginen kalejira bat egitera. Bertan, herrian barrena, kalejira egin ondoren, gurasoek ostatuan prestatutako hamaiketako izugarria gosaldu genuen. Patxadaz egon ginen elkartean.
Ederki gosalduta, herriko plazara kilikiekin jolastera joan ginen. Gero, musika jarri eta dantzan aritu ginen.
Eguerdian, eskolara bueltatu eta bokata bat jan genuen. Eguna amaitzeko, polikiroldegian antolaturiko jolasetan jolasteko aukera izan genuen.
Azken batean, ederki pasatzeko jai-giroa sortu zen!
Gaur egun, nahiz eta gure eskura jostailu asko izan, zelako poza sentitzen dugun gureak asmatzen eta egiten ditugunean, eh?
Hori dela eta, atal honetan, jostailu tradizionalak prestatzeko bideoak izango dituzue, lagunak. Bertan, modu erraz batean, beharrezko materialak eta sortze-prozesuaren urratsak aurkituko dituzue. Gurasoekin, lagunekin, anai-arrebekin..., nahi duzuen pertsonekin, egin ahal izateko. Ongi pasatzeaz gain, gauza asko ikasteko eta materiala birziklatzeko aukera ere izango duzue.
Hementxe daude lehendabiziko bi proposamenak, Edurne eta Ioritzek egindakoak: telefono bat eta bola-zulo bat, hurrenez hurren. Horretarako, irudietan klik egin.
Ikusiko duzuenez, bururatzen zaizuen edozein ideia baliagarria suerta daiteke jostailu berri bat prestatzeko!
Animatu zaitezte eta zuen ideiak eta jostailuak besteokin partekatu!
Grimm anaien ipuin famatua da, betiko istorio bat. Protagonistak baserriko lau animalia dira: astoa, txakurra, katua eta oilarra.
Agian, ezagunagoak suertatuko zaizkizue "Trotamusikariak" izeneko marrazki bizidunak, eh?
Istorioa gustuko genuenez, aspaldiko ipuin hori eguneratzea eta moldatzea erabaki genuen Haur Literaturako txontxongilo antzerkia prestatzeko: "Amezkoako txaranga".
Lan horretan lau lagun aritu gara (Maite, Amaia, Ioritz eta Edurne) eta honakoa izan da gure sortze-prozesua:
- Lehendabizi, gidoia egin genuen ipuina antzerki bihurtuz.
- Gero, beharrezko eszenatoki, txontxongilo eta grabaketa-materialak zehaztu eta prestatu genituen.
- Azkenik, grabaketa burutu eta bideoa Movie Maker programarekin sortu genuen.
Prozesu luze eta konplexu honetan, oso ongi pasatzeaz gain, asko ikasi dugu eta hori guztia azken emaitzan islatzen dela uste dugu.
Beraz, txontxongilo antzerki dibertigarria ikusteko, argazkiaren gainean klik egin.
Gure eskolako haurrek "ERLEAK" proiektua landu dutenez, webquesta gai horren inguruan egitea erabaki dugu. Lana garatzeko, gure taldearen nolakotasunak (adina, kopurua, interesak...) kontuan izan ditugu.
Hezkuntza arloko Teknologia Berrien ikasgaian murgiltzeko, gai honen inguruko artikulu bat hartu eta ideia garrantzitsuenak honako kontzeptu mapetan islatu ditugu. Kasualitatez, biak testu berdinean oinarritzen dira (Carmen López Escribanoren "Las Nuevas Tecnologías y la Educación Infantil").
Hala ere, ikus daitekeenez, mapak erabat ezberdinak dira.
Hemen duzue gure gela! Ikusi zeinen dotore eta handia den!
Bertan ekintza ezberdinak burutzen ditugu, asteko antolamendu honi jarraituz:
ASTELEHENA
ASTEARTEA
ASTEAZKENA
OSTEGUNA
OSTIRALA
9:30-11:10
KORROA + TXOKOAK
11:10-12:00
GOSARIA + JOSTALDIA
12:00-12:30
Protagonista
Erlajazioa
Laborategia
Ipuina
Protagonistaren liburu ibiltaria
12:30-13:10
Erlijioa/Txokoak
Ipuina
Proiektua edo Protagonistaren gurasoak
Ipuina
13:10–14:50
BAZKARIA+ SIESTA
BAZKARIA+ SIESTA
ETXERA
BAZKARIA+ SIESTA
BAZKARIA+ SIESTA
14:50-16:30
Psikomotrizitatea
Antzerkia
Kantak, olerkiak…
Irakasleen antzerkia
Orain, ekintza horietan egiten duguna erakutsi eta azalduko dizuegu.
TXOKOAK
Bederatzi txoko ezberdinetan aritzeko aukera dugu, haur hezkuntzako gelen ateak irekitak egoten baitira. Bertan, zikloko haur guztiak biltzen gara (3,4 eta 5 urteko haurrak) eta, horrela, aldibereko elkarrekintzaren bitartez, gure lagunen harreman sarea era natural batean zabaltzeko aukera dugu.
Zer da txoko bat?
Txokoak espazio edo gune irekiak dira eta horietan haurrek material guztia haien eskura dute (material asko egituratu gabekoa izaten da). Gelako txokoak diseinatzerako orduan, haurren gurariak eta lortu nahi diren helburu didaktikoak batzea bilatzen da, haurrak gustora, interesatuak eta motibatuak egon daitezen. Horretarako, irakasleak gelako txokoak estetikoki atseginak eta erakargarriak izan daitezen saiatzen dira. Txoko batzuk finkoak dira (etxea, plastika edo informatika txokoa, adibidez) eta, beste batzuk, aldakorrak (gurari eta beharren arabera moldatzen direnak).
Nola aritzen gara txokoetan?
Txokoen aukeraketa "librea" izaten da, baina txoko bakoitzean egon gaitezkeen haur kopurua mugatua dago. Horrela, ez gaude denbora guztian txoko berean eta aukera ezberdinak ezagutzen ditugu. Jolas librea, irudimena, elkarbizitzarako arauak, autonomia eta harremanak, besteak beste, lantzen ditugu.
Guk jolasten dugun bitartean, zer egiten dute irakasleek?
Behaketa koadernoan bere taldeko haurren lorpenak, zailtasunak, ekoizpenak, jarrerak… jasotzen dituzte. Bestetik, beti guri laguntza emateko prest daude.
PROIEKTUKA LAN EGITEA
Gure eskolan proiektuka egiten dugu lan. Egunero (asteazkenetan izan ezik), goizeko azken saioan proiektuaren inguruan lan egiteko momentua heltzen da. Programazioko proiektuak haurren ohiko interes edo motibazioetatik sortzen dira (nahiz eta aldez aurretik irakasleek planifikatuak izan, egoera berrirako moldatu edo aldatzen dira) edo guk, bat-batean, proposatzen ditugun gaiak ere izan daitezke.
Normalean, egunkariko irakurketan nahiz jolas librean antzematen dira interes berezia sortzen dizkiguten gaiak. Interesgunea erabakita dagoenean, dakiguna eta jakin nahi duguna denon artean zehazten dugu eta… lanari ekiten diogu!
Orain arte, “Edurne Pasabanen 14 zortzimilakoak”, “Alakrana untziaren bahiketa”, “Krisi ekonomikoa” eta “Erleak” landu ditugu. Asko ikasi eta oso ondo pasa dugu!
Nahi baduzue, hemen erleen inguruko proiektuaren nondik-norakoak ikusteko aukera duzue.
PROTAGONISTA
Astero, gelako lagun bat protagonista izaten da. Hori dela eta, egunero protagonistaren inguruko jarduera bat egiten dugu:
- astelehena: protagonistak etxetik bospasei argazki ekartzen ditu. Korroan, familiarekin, lagunekin edota bakarrik agertzen den argazkiak erakusten ditu azalpen batzuk emanez. Gero, kartulina handi batean itsasten ditu eta gelan geratzen da denok ikusi ahal izateko.
- asteartea: protagonistak bere esku-aztarnak paper batean inprimatzen ditu eta irakasleak bere altuera neurtzen du.
- osteguna: denok protagonistaren erretratoa marrazten dugu.
- ostirala: irakasleak kartulinako argazkiekin eta protagonistak astean zehar egindako lanekin liburuxka bat egiten du eta protagonistari ematen dio. Gelako lagun guztioi erakutsi ondoren, liburuxka etxera eramaten du.
- asteko egun batean, protagonistaren familiako kideren bat edo lagunen bat klasera etortzen da eta proposamen berezia eskaintzen digu: maskarak egitea, kartulinen bidez istorio bat kontatzea, dantza bat edo abesti bat erakustea, errezetaren bat prestatzea, ponpa erraldoiak egitea, bere lanbidearen inguruko azalpenak ematea… Jarduera honetan parte hartzeko, ez da beharrezkoa euskara jakitea.
PSIKOMOTRIZITATEA
Acouturierren ereduari jarraituz, psikomotrizitatea umeek euren emozioak ekintza ezberdinen bitartez askatzeko bidea da.
Astean behin, bigarren pisuko psikogelara joaten gara. Gela horretan, psikomotrizitateko hainbat materialekin jolasten gara; hala nola: goma-espumazko moduluak, tamaina ezberdinetako koltxonetak, espalderak, ispiluak, oihalak...
Saio guztiak ezberdinak diren arren, beti erritual berberak jarraitzen ditugu:
- Gelara iritsi eta, banku batean eserita, zapatak kentzen ditugu.
- Estiren laguntzaz, psikomotrizitateko arau nagusiak (ez minik eman, ez bultzatu eta ez gehiegi oihukatu) birpasatzen ditugu.
- Estik “bat, bi eta hiru” kontatutakoan, korrika joaten gara berak aurretik eraiki duen goma-espumazko horma botatzera.
- Jolas librerako garaia da! Aukerak infinitoak dira: espalderetara igo, saltoak eta txiribueltak eman, eraikuntzak egin, oihalekin jolas sinbolikoan aritu...
- Batzuetan, saioan egindakoa edo bizitako sentipenak marrazki baten bidez adierazteko denbora dugu. Bestela, erlaxapen saio bat egiten dugu edo ipuin bat kontatzen digu Estik.
Psikomotrizitate saioan zehar, irakaslea erne egoten da gu behatzeko eta egoera gatazkatsuak edo mingarriak ekiditeko.
ANTZERKIAK
Antzerkia asko gustatzen zaigun egunerokotasuneko ekintza da. Bi motatako antzerkiak ditugu: alde batetik, guk egiten duguna eta, bestetik, irakasleek guretzako prestatzen dutena. Mezu eta balore asko ikasten ditugu antzerkiaren bitartez.
Ikasleen antzerkia: astelehen arratsaldetan, antzezle edo aktore-aktoresa bihurtzen gara. Antzezlan obra txikiak egiten ditugu, guk pentsatuak eta inprobisatuak edo irakurritako ipuin bateko dramatizazioa eginez. Estik grabatzen ditu eta, ondoren, lana pantailan ikusten dugu.
Irakasleen antzerkia: astea amaitzeko, gure irakasleek prestatutako antzezlanaren ikusle bilakatzen gara. Gai ezberdinetako antzerkiak burutzen dituzte. Horrela, antzerkiaz gozatzea edo adierazpen mota ezberdinak ezagutzea lortzen dugu. Gainera, irakasleak haurren ohiko egoeratan ikustaraztea dibertigarria eta hezigarria suertatzen da (irakasleak gure lekuan jarrita, nola bizitzen dugun gogoratzea eta sentitzea lortzen dugu).
Hurrengo irudietan gure irakasleak “UHARTEAN GALDUAK” antzezten daude.
Astero, eskolako talde bat Esan-Erran irratira joaten da. Hortaz, guri hilabetean behin joatea tokatzen zaigu. Irratia eskolatik bost minututara dago eta, bertara, oinez joaten gara, poz-pozik.
Irratsaiorako materiala, aldez aurretik, gelan prestatzen dugu. Momentuz, abestiak, ipuinak edo elkarrizketak egin ditugu.
Irratira heltzen garenean, tekniko batek zuzeneko saioa grabatu egiten du. Ondoren, gure irakasleak eskolako blogera igotzen du guraso guztiek entzuteko aukera izan dezaten.
Irratiaz gain, beste ekintza berezi asko burutzen ditugu: txangoak mendira hostoak jasotzeko edo gaztainak biltzeko, inguruko baserrietara bisitak animaliak ikusteko, errezetak prestatu eta partekatzen ditugu… eta ezin dugu aipatu gabe utzi gure laborategiko zenbait ikerketa.
Oihanzabal ikastetxeko 3 urteko taldea gara. Hamalau lagun gaude gelan eta Esti da gure irakaslea.
Gure eskola Jaunsarats herrian dago (Nafarroa) eta Basaburua bailarako herri ezberdinetako haurrak biltzen gara bertan.
Eskola txikia eta oso gertukoa da: 3-12 urte bitarteko 74 lagun gaude eta 10 irakasle ditugu. Baso baten ondoan kokatuta dagoenez, askotan inguruko naturaz gozatzera irteten gara.
